«Üç əsrin qəzeti» kitabı «Kaspi» qəzetinin 130 illik yubileyinə həsr olunub. Kitabda qəzetin 1881-ci ildən başlanan tarixini, inkişaf yolunu və müasir dövrünü izləmək mümkündür. «Kaspi» qəzeti 130 illiyi münasibətilə 2011-ci il aprelin 1-dən mətbuat tarixinin araşdırmaçıları və ekspertlər arasında elmi və publisistik məqalələrin qəbulu üçün müsabiqə elan etdi. Həmin ilin avqustun 31-nə kimi davam edən müsabiqəyə təqdim olunan əsərlər münsiflər tərəfindən dəyərləndirilərək kitaba daxil edilib. Tədqiqat əsərləri XIX əsrin sonları XX əsrin əvvəllərində Azərbaycan mətbuatının yaranması və «Kaspi» qəzetinin mətbuat tarixində yerini, qəzetin işıqlı ziyalıların əsas tribunasına çevrilməsini izləməyə imkan verir. Bununla yanaşı, «Kaspi» qəzeti Azərbaycan tarixini öyrənən mənbə kimi araşdırılıb. Eyni zamanda, Azərbaycanın müstəqillik əldə etməsindən sonra «Kaspi»nin nəşrinin bərpa olunması və yeni mərhələdə fəaliyyəti, qəzetin dil, üslub və tematikası, ümumiyyətlə, müstəqil Azərbaycan mətbuatında «Kaspi» qəzetinin yeri məsələləri ayrıca tədqiqat predmetinə çevrilib. Kitab Azərbaycan mətbuatının keçdiyi yol və müasir mərhələsinin izlənilməsi, habelə ictimai-siyasi fikir tariximizin öyrənilməsi baxımından faydalı ola bilər. Kitabda ilk dəfə işıq üzü görən bir çox tarixi fotoları təqdim etdiyi üçün www.fotobank.az saytına təşəkkür edirik.