Ayşə Kulinin “Vida – əsir şəhərdə bir gün” əsəri təxminən bir əsr əvvəlin hadisələrindən bəhs edir. Birinci Dünya müharibəsinə qoşulan və hərbi kampaniyada uğursuzluqlara düçar olan Osmanlı imperiyasının paytaxtı işğal olunur, sultan və onun nazirləri yadelli işğalçıların əlinin altında məzlum vəziyyətə düşürlər. Ancaq vətənpərvərlər bununla barışmır, gizli dərnəklərdə birləşərək azadlıq, müstəqillik uğrunda mübarizəyə başlayırlar.
Əsərdə hadisələr əsasən bir nazirin evində cərəyan edir. Nazirin xalası nəvəsi inqilabçıdır və doğma İstanbulunun azadlığına çalışır. Nazir Əhməd Rəşad əvvəlcə onu düz yola dəvət etsə də, sonradan məhz Kamalın düz yolda olduğunu görür və işğalçılara qarşı vuruşanlara dəstək verir.
Yazıçı “Vida”nı olduqca koloritli, canlı təhkiyə ilə yazıb. Romanda sevgi-məhəbbət mövzusu da parlaq işlənilib.