Quliyev Allahyar Allahverdi oğlu 3 fevral 1946-cı ildə Qarabağın məşhur Xocalı kəndində anadan olub. Xocalıda səkkizillik məktəbi bitirdikdən sonra Xankəndindəki N.Gəncəvi adına 4 nömrəli orta məktəbdə təhsilini davam etdirib, orta məktəbi Bakı şəhərində bitirib. 1966–1969-cu illərdə Ukraynada Sovet Ordusu sıralarında hərbi xidmətdə olub. Hərbi xidmətdən sonra Bakıda və Xankəndində milis vəzifəsində çalışıb. 1979-cu ildə Xankəndi Dövlət Pedaqoji İnstitutunu bitirib. Dağlıq Qarabağın Daşbulaq, Meşəli, Saruşen, Həsənabad kəndlərində müəllimlik edib. «Xocalının səsi» qəzetinin yaradıcılarından biri olub, uzun müddət qəzetdə şöbə müdiri işləyib. Xocalı soyqırımından sonra Oğuzda, uzun müddət Naftalan şəhərindəki «Şirvan» sanatoriyasında məskunlaşıb. 1993–1997-ci illərdə Xocalı RİH-nin Xocalı şəhəri üzrə nümayəndəsi vəzifəsində çalışıb. 1993-cü ildə «Vətən ağrısı, torpaq yanğısı», 1999-cu ildə «Xocalı soyqırımının qurbanları» kitabları çap edilib.
