Yeri gəlmişkən, qeyd edim ki, həbsxana əhli doğrudan da, savadlı idi – məcazi mənada deyil, hərfi mənada. Yəqin ki, onların yarısından çoxu yazıb-oxumağı bacarırdı. Başqa harada, rus xalqının böyük bir kütlə halında yığışmış olduğu hansı yerdə siz onlardan iki yüz əlli nəfərlik bir dəstə ayıra bilərsiniz ki, onların yarısı savadlı olsun? Sonralar eşitdim ki, kimsə buna bənzər məlumatdan belə bir nəticəyə gəlib ki, savadlılıq xalqı məhv edir. Yanlış fikirdir: burada tamam başqa səbəblər var; hərçənd razılaşmamaq da olmaz ki, savadlılıq xalqda lovğalıq yaradır. Amma bu, əsla qüsur deyil.