Sekston başa düşürdü ki, NASA-nın lehinə olan Hollivud quraşdırmaları sırf iqtisadi əsasa malikdir. Tom Kruzun qırıcı təyyarənin pilotu rolunu oynadığı “Topqan” blokbasteri çox böyük populyarlıq qazanandan sonra NASA Hollivudun istənilən strukturun populyarlığının artırılması işində necə bir potensiala malik olduğunu çox tez dərk etdi. Həmin film mahiyyət etibarilə Amerika hərbi-dəniz donanmasının və aviasiyasının iki saatlıq reklam çarxıydı. Agentlik kinostudiyalara öz poliqonlarında və meydançalarında – kosmodromlarda, uçuş-enmə zolaqlarında, uçuşların idarə edilməsi mərkəzlərində, məşq mərkəzlərində işləmək üçün səs-küy salmadan, sakitcə, havayı imkan yaratmağa başladı. Hər yerdə ərazilərin istifadə olunması üçün çox böyük qonorarlar verməyə vərdiş edən prodüserlər milyonlarla istehsalat puluna qənaət etmək üçün “havayı” meydançalarda filmlərini çəkərək bu imkandan məmnunluqla yapışdılar. Və aydın məsələdir ki, Hollivud bu yerlərdə işləməyə icazəni yalnız NASA ssenarini bəyənəndən sonra alırdı.