– Romanları da oxudun?
– Hə, çox maraqlıdır! Çox vaxt oxuyanda ağlayıram. Nə qədər kədərlidi çoxu. İnsanların başına elə şeylər gəlir ki...
– Bunlar həyatın gerçəkləridir. Hökumət sistemləri yazıq milləti istismar etməklə, öz qüdrət və sərmayələrini çoxaltmaqla onların zəhmətlərinin mənfəətini öz ciblərinə doldurur. Bu ədalətsizliyin ucbatından xalqlar əziyyət çəkir.
– Çox ağrılıdı. Bəs biz nə etməliyik?
– Mübarizə aparmalıyıq. Hər kəsin borcudur bu zülmün qarşısını almaq. Hər azad insan ədalətsizliklə mübarizə aparmalıdır. Ta bu sistem yıxılana qədər. Bu tarixin haqq-hesabıdır. Dünyanın bütün sitəmini çəkmiş insanlarla birlik olub, bu ədalətsizlikləri aradan qaldıracaqlar. Biz gərək bu qiyamdan kənarda qalmayaq.