Bütün məsələ bundadır ki, biz kasıb və əhəmiyyətsiz insanlarıq, – dedi. – Bizim bədbəxt həyatlarımızın tarixdə heç bir yeri yoxdur ki. Axırda hamımız bu bədbəxt Qarsda ölüb gedəcəyik. Heç kimin yadına düşməyəcəyik, bizi heç vecinə də almayacaq. Çünki biz illər boyu qadınlar başlarına nə bağlasın deyə bir-biri ilə boğuşan, mənasız və axmaq məsələlərlə əlləşib-vuruşan əhəmiyyətsiz insanlarıq. Bizi hamı unudacaq. Bu dünyada belə axmaq həyatlar yaşayaraq, heç bir iz buraxmadan keçib getdiyimizi görəndə başa düşürəm ki, həyatda eşqdən başqa heç nə yoxdur.