Beş seçilmiş ve Yuxu Alemi

havanın gözəl qoxusunu hiss edirdi. Bütün bunlar nə qədər xoş səslənsə də, Fərhadda qəribə hisslər yaranmışdı. Nəyin baş verdiyini anlamayaraq ayağa qalxdı. Elə o an üzərində ağappaq paltarların olduğunu gördü. Uzunqol köynəyindən ayaqqabısına qədər hər şeyi bəyaz idi. Ancaq ətrafa baxmağa başlayanda daha da təəccübləndi. Gözəl bir meşədə idi. Hündür ağaclar və rəngbərəng çiçəklər göz oxşayırdı. Öz ətrafında dövrə vuraraq ağzıaçıq şəkildə mənzərəni seyr etməyə başladı. Həmin yer nə qədər füsunkar olsa da, Fərhadı əsas maraqlandıran şey harada olduğu idi. Beynində yaranan sual fırtınası getdikcə güclənirdi. “Bura necə gəldim, haradayam, nə etməliyəm?” – deyə düşünürdü. “Cənnətdəyəm?” – öz-özünə dedi, ancaq inanmadı. Ardından ağlına daha yaxşı fikir gəldi: “Axırıncı dəfə yatdığımı xatırlayıram, görəsən, yuxudayam?”

Elə bu an arxasından bir qız səsi gəldi:

– Kimsən?

Səsdən diksi